ನಂಬಲು ಅಸಾಧ್ಯವಾದ ರಾಜಕೀಯ ಘಟನೆ ಅಮೇರಿಕೆಯಲ್ಲಿ. ಸರಪಳಿ ಬಿಗಿದು ಆಫ್ರಿಕಾ ದೇಶಗಳಿಂದ ಗುಲಾಮಗಿರಿಗಾಗಿ ಅಮೆರಿಕೆಯ ಕಡಲತೀರದ ಮೇಲೆ ಎಸೆಯಲ್ಪಟ್ಟ ಕರಿಯರ ಪೈಕಿಯವರಾದ ಬರಾಕ್ ಒಬಾಮ ಅಮೆರಿಕೆಯ ಅಧ್ಯಕ್ಷ. ಇದನ್ನು ನೋಡಿದವರಿಗೆ ತಿರುಕನ ಕನಸು ನೆನಪಾಗದಿರದು.
ಕೇವಲ ಕೆಲವೇ ದಶಕಗಳವರೆಗೆ ಮತ ಚಲಾಯಿಸಲೂ ಸಾಧ್ಯವಾಗದಿದ್ದ ನಾಡಿಗೆ ಕರಿಯ ಅಧ್ಯಕ್ಷ. ಕ್ರೈಸ್ತರಾಗಿದ್ದಾರೂ ಬಣ್ಣ ಕಪ್ಪು ಎಂಬ ಒಂದೇ ಕಾರಣಕ್ಕೆ ಚರ್ಚುಗಳಿಗೆ ಪ್ರವೇಶವಿಲ್ಲ. ಬಿಳಿಯರು ಹೋಗುವ ಶಾಲೆಗೆ ಕರಿಯರ ಮಕ್ಕಳು ಹೋಗುವಂತಿಲ್ಲ. ಕರಿಯ ಅಪ್ಪಿತಪ್ಪಿಯೂ ಬಿಳಿ ಹೆಣ್ಣನ್ನು ಮದುವೆಯಾಗುವುದಿರಲಿ, ಕಣ್ಣೆತ್ತಿಯೂ ನೋಡುವಂತಿಲ್ಲ. ಸಾರ್ವಜನಿಕ ಬಸ್ಸುಗಳಲ್ಲಿ ಮುಂದಿನ ಬಾಗಿಲಿನಿಂದ ಹತ್ತುವಂತಿಲ್ಲ. ಒಂದೇ ಎರಡೆ ಅವರ ಮೇಲೆ ನಡೆದ ಅತಿರೇಕಗಳು. ಆ ದೇವರು ಬಿಳಿಯರ ಅಹಂಕಾರಕ್ಕೆ ಸರಿಯಾದ ಮದ್ದನ್ನೇ ಅರೆದ.
ತಮ್ಮ ಉದ್ಘಾಟನಾ ಭಾಷಣದಲ್ಲಿ, ಅರವತ್ತು ವರ್ಷಗಳ ಹಿಂದೆ ತನ್ನ ತಂದೆಗೆ ಹೋಟೆಲಿನಲ್ಲಿ ಊಟ ನಿರಾಕರಿಸಿರಬಹುದಾದ ಅಮೇರಿಕೆಯಲ್ಲಿ ಇಂದು ನಿಮ್ಮೆಲ್ಲರೆದುರಿಗೆ ಸತ್ಯಪ್ರತಿಜ್ಞೆ ಸ್ವೀಕರಿಸಲು ನಿಂತಿದ್ದೇನೆ ಎಂದು ಭಾವುಕರಾದ ಒಬಾಮ ನುಡಿದರು.